O club desenvolveu máis de vinte horas de traballo didáctico en doce centros educativos de Cangas, Moaña e Marín, antes de reunir a máis de 250 escolares no torneo final celebrado no Pavillón de Romarigo.
O Club Balonmán Cangas concluíu cun grande éxito unha nova edición da campaña “XOGADE: Sal aí e móvete”, desenvolvida en colaboración co Servizo Provincial de Deportes da Xunta de Galicia. A iniciativa reforzou a aposta do club pola promoción da actividade física, os hábitos saudables e o deporte base entre a mocidade da comarca do Morrazo.
A edición de 2026 supuxo unha evolución respecto ás anteriores campañas, recuperando o traballo previo nos centros educativos e incorporando novas ferramentas didácticas para achegar o alumnado á práctica deportiva dunha maneira máis participativa, progresiva e inclusiva.
Durante o mes de xuño, o Club Balonmán Cangas desenvolveu máis de dez xornadas de actividade e máis de vinte horas de traballo didáctico en doce colexios de Cangas, Moaña e Marín. A campaña chegou a preto de 24 aulas de 4º de Primaria, coa realización de dúas sesións por grupo.
Nestas sesións, o alumnado puido iniciarse en tres modalidades deportivas: Datchball, Tchoukball e Minibalonmán. A introdución dos dous primeiros deportes permitiu traballar, antes de chegar ao balonmán, aspectos como o lanzamento, o pase, a ocupación dos espazos, a cooperación, a toma de decisións, o respecto polas normas e a participación activa de todos os nenos e nenas.
A actividade contou coa participación de centros educativos como Reibón, Seara, Castrillón, San Roque, Seixo, Espiñeira, Tirán, A Laxe ou Quintela, entre outros. Deste xeito, a campaña consolidouse como unha iniciativa de carácter comarcal, conectando o deporte profesional, o deporte base e a comunidade educativa.
Como peche do proxecto, o Club Balonmán Cangas organizou durante tres días os torneos interescolares no Pavillón de Romarigo, polos que pasaron máis de 250 escolares. A xornada final desenvolveuse nun formato rotatorio e formativo, no que o alumnado puido poñer en práctica as tres disciplinas traballadas previamente nos centros.
O torneo converteuse nun espazo de convivencia deportiva entre colexios, no que a aprendizaxe, a diversión e a participación estiveron por riba do resultado. A experiencia permitiu que os nenos e nenas compartisen pista, coñecesen novas modalidades e se aproximasen ao balonmán desde unha proposta adaptada á súa idade e ao contexto escolar.
Con esta iniciativa, o Club Balonmán Cangas reafirma o seu compromiso co desenvolvemento do deporte base e coa promoción de hábitos saudables entre a mocidade, empregando a súa estrutura deportiva como ferramenta de impacto educativo e social no territorio.
